मराठा आरक्षण: २९ ऑगस्टनंतर ८० लाख पोरांसह थेट ‘वर्षा’वर धडकणार? मनोज जरांगे पाटलांचा सरकारला जळजळीत इशारा
बीड/अंतरवली सराठी/विश्वमंथन
मराठा आरक्षण आणि कुणबी प्रमाणपत्राच्या मुद्द्यावरून राज्यभरात वातावरण पुन्हा एकदा ढवळून निघाले असून, मराठा आंदोलनाचे नेते मनोज जरांगे पाटील यांनी थेट सरकारला जोरदार इशारा दिला आहे. २८ ऑगस्टपर्यंत मागण्या पूर्ण कराव्यात, अन्यथा २९ ऑगस्टपासून अंतरवली सराठीत होणारे आंदोलन थेट मुंबई आणि मुख्यमंत्र्यांच्या शासकीय निवासस्थानावर म्हणजेच ‘वर्षा’ बंगल्यावर धडकणार, असा आक्रमक पवित्रा त्यांनी घेतला आहे. सरकारकडून चर्चेसाठी गेलेल्या शिष्टमंडळाला वेळ देण्यास त्यांनी स्पष्ट नकार दिला असून, आता आणखी कोणताही वेळ दिला जाणार नाही, असे सुनावले आहे.
मुंबईतील आंदोलनाबाबत प्रशासनाने नवे नियम लागू केले असून, आझाद मैदान वगळता दक्षिण मुंबईत इतर ठिकाणी धरणे आंदोलने किंवा मोर्चे काढण्यास मज्जाव करण्यात आला आहे. या निर्णयावर जोरदार प्रहार करताना जरांगे पाटील म्हणाले की, मराठा समाजाला मुंबईत येण्यापासून रोखण्यासाठीच हे नियम जाणीवपूर्वक लागू करण्यात आले आहेत. जर शासनाकडून आंदोलनात अडथळे निर्माण केले गेले, तर परिस्थिती आणखी बिघडेल आणि तीव्र संघर्ष ओढवेल, असा इशारा त्यांनी दिला आहे. जनतेने मते देऊन सत्तेवर बसवले आहे, पण आज तेच लोक आमच्या लेकरा-बाळांच्या मदतीला येण्याऐवजी दादागिरी आणि दहशत पसरवत आहेत, अशी खरमरीत टीका त्यांनी केली. सत्तेचा असा गैरवापर अजिबात खपवून घेतला जाणार नाही, असा इशारा देत मराठ्यांच्या पुढे कोणाचेही शहाणपण चालणार नाही, असे त्यांनी स्पष्ट शब्दांत सांगितले.
मागील आंदोलनादरम्यान मोठ्या संख्येने आंदोलक मुंबईत दाखल झाल्यामुळे रस्त्यांवर प्रचंड वाहतूक कोंडी झाली होती आणि सामान्य नागरिकांना तसेच रुग्णालये, न्यायालयीन कामांसाठी जाणाऱ्या लोकांना मोठ्या त्रासाला सामोरे जावे लागले होते. मात्र, एवढा मोठा जनसमुदाय शांततेच्या मार्गाने एकत्र आणून सरकारवर यशस्वी दबाव आणण्याची ताकद दाखवून दिली होती. आता मात्र परिस्थिती पूर्णपणे बदलली असून यावेळी निर्णायक लढा देण्याची भूमिका घेतली आहे. अंतरवली सराठी हे आंदोलनाचे मुख्य केंद्र असले, तरी तिथे काही कारवाई झाली किंवा मागण्या मान्य झाल्या नाहीत, तर हा जनसागर थेट मुंबईच्या दिशेने वळेल, अशी दाट शक्यता वर्तवली जात आहे. एवढ्या मोठ्या संख्येने लोक एकत्र मुंबईकडे निघाले तर कायदा, सुव्यवस्था आणि प्रशासकीय यंत्रणेसमोर मोठे आव्हान उभे ठाकू शकते.
’वर्षा’ बंगला हे मुख्यमंत्र्यांचे शासकीय निवासस्थान असल्याने मलबार हिल आणि लगतच्या अतिसंवेदनशील भागात मोठ्या आंदोलनाला परवानगी मिळणे प्रशासनासाठी अत्यंत कठीण असणार आहे. जर आंदोलकांना तिथे जाण्यापासून रोखले गेले, तर राजकीय व सामाजिक संघर्ष आणखी चिघळण्याची शक्यता आहे. मराठा आरक्षणाचा प्रश्न हा केवळ राजकीय विषय नसून तो लाखो कुटुंबांच्या शिक्षण, नोकरी आणि उदरनिर्वाहाच्या भविष्याशी जोडलेला आहे. त्यामुळे या आंदोलनाच्या प्रत्येक घडामोडीकडे संपूर्ण महाराष्ट्राचे लक्ष लागून राहिलेले आहे.
यादरम्यान जरांगे पाटील यांनी स्पष्ट केले की, २९ ऑगस्टला अंतरवली सराठी येथे आंदोलन होईल, परंतु मराठा समाजाला आपल्या सोयीनुसार ३० ऑगस्टपासून ते ८ सप्टेंबरपर्यंत कधीही मुंबईत येण्याची मुभा आहे. एकाच दिवशी सर्वजण जमण्याऐवजी टप्प्याटप्प्याने किंवा सवडीनुसार येऊन ही मोठी लढाई लढायची आहे आणि एकदा मैदानात उतरल्यानंतर यश मिळवल्याशिवाय माघारी फिरायचे नाही, असा निर्धार त्यांनी व्यक्त केला आहे. आता २८ ऑगस्टची दिलेली अंतिम मुदत संपल्यानंतर सरकार काय पावले उचलणार आणि २९ ऑगस्टनंतर नेमकी कोणती नवीन दिशा समोर येणार, याकडे संपूर्ण राज्याचे डोळे लागले आहेत.
