टीएमसीमध्ये मोठी फूट; ममता बॅनर्जींच्या अत्यंत विश्वासू खासदार सायोनी घोष यांच्या बंडखोरीने राजकीय वर्तुळात खळबळबळ, महुआ मोइत्रा भावूक
कोलकाता:
पश्चिम बंगालच्या राजकारणातून या घडीची अत्यंत मोठी आणि सनसणीत बातमी समोर येत आहे. तृणमूल काँग्रेस म्हणजेच टीएमसी पक्षामध्ये उभी फूट पडली असून मुख्यमंत्री ममता बॅनर्जी यांच्या अडचणीत प्रचंड वाढ झाली आहे. ममता बॅनर्जी यांची सत्ता गेल्यानंतर पक्षाला लागलेली गळती थांबण्याचे नाव घेत नाहीये. यातच आतापर्यंत ममता बॅनर्जी यांच्या अत्यंत जवळच्या, विश्वासू आणि पक्षाचा तरुण चेहरा समजल्या जाणाऱ्या जाधवपूरच्या खासदार सायोनी घोष यांनी थेट बंडखोरी केल्यामुळे संपूर्ण देशाच्या राजकीय वर्तुळात प्रचंड खळबळ उडाली आहे. जे सायोनी घोष यांच्यावर ममता बॅनर्जींनी पोटच्या मुलीसारखे प्रेम केले आणि पक्षात मोठी पदे दिली, त्याच सायोनी घोष यांनी बंडखोरीच्या कागदपत्रांवर स्वाक्षरी केल्यामुळे राजकीय विश्लेषकही चक्रावून गेले आहेत. या संपूर्ण प्रकरणावर टीएमसीच्या आक्रमक खासदार महुआ मोइत्रा यांनी अत्यंत भावूक प्रतिक्रिया दिली असून, सायोनी ही माझ्यासाठी लहान बहीण आणि मुलीसारखी आहे, ती कधीच दगाफटका करू शकत नाही, पण सध्या ती भीतीच्या छायेखाली वावरत असल्याचे मोठे वक्तव्य त्यांनी केले आहे.
पश्चिम बंगालमध्ये ममता बॅनर्जी यांनी नेहमीच ‘माती आणि माणूस’ यांचे राजकारण करत महिला नेत्यांना मोठ्या प्रमाणावर प्रोत्साहन दिले. याच धोरणातून त्यांनी सायोनी घोष यांच्यावर मोठी जबाबदारी सोपवली होती. २०२१ च्या विधानसभा निवडणुकीत आणि त्यानंतर २०२४ च्या लोकसभा निवडणुकीत ममता बॅनर्जी यांनी सायोनी यांना खासदारकीचे तिकीट दिले. इतकेच नव्हे तर पक्षाच्या अत्यंत महत्त्वाच्या समजल्या जाणाऱ्या युवा विंगचे अध्यक्षपद देखील सायोनी घोष यांच्याकडे सोपवण्यात आले होते. अगदी अलीकडे जेव्हा पक्षात धुसफूस सुरू होती, तेव्हाही ममता बॅनर्जी यांनी सायोनी यांच्यावरील विश्वास कायम ठेवत त्यांना पुन्हा एकदा युवा विंगच्या अध्यक्षपदी नियुक्त केले होते. संसदेमध्ये जेव्हा सायोनी घोष पांढरी साडी आणि कपाळावर लाल टिकली लावून आक्रमकपणे भाषण करायच्या, तेव्हा लोकांमध्ये त्यांची प्रतिमा ‘दुसरी ममता बॅनर्जी’ अशी झाली होती. ममता बॅनर्जी यांच्या सुरुवातीच्या काळातील आक्रमक आणि रस्त्यावर उतरून संघर्ष करण्याच्या पद्धतीची तुलना थेट सायोनी घोष यांच्यासोबत केली जात होती. मात्र, सत्ता हातातून जाताच सायोनी घोष यांनी घेतलेल्या या निर्णयामुळे राजकीय वर्तुळात तर्कवितर्कांना उधाण आले आहे.
या मोठ्या बंडखोरीनंतर टीएमसीच्या फायरब्रँड नेत्या आणि खासदार महुआ मोइत्रा यांनी एका मुलाखतीदरम्यान सायोनी घोष यांच्याबद्दल अनेक मोठे खुलासे केले. सायोनी ही पैशांसाठी विकली गेलेली नाही, असे म्हणत महुआ मोइत्रा यांनी सायोनीची पाठराखण केली आहे. महुआ मोइत्रा म्हणाल्या की, सायोनी घोष हिचे राजकीय करिअर अजून खूप लहान आहे. ती पहिल्यांदाच खासदार झाली आहे आणि ती स्वभावाने अत्यंत साधी व तत्त्वांवर जगणारी मुलगी आहे. तिने पैशांच्या हव्यासापोटी पक्षाशी किंवा ममता बॅनर्जींशी बेईमानी केलेली नाही. मात्र, सध्याच्या बदललेल्या राजकीय परिस्थितीमुळे ती प्रचंड घाबरली आहे. तिच्या मनात कोणत्या गोष्टीची भीती आहे, हे महुआ मोइत्रा यांनी पूर्णपणे स्पष्ट केले नसले, तरी सायोनीसारख्या धाडसी नेत्याला नेमकी कशाची भीती वाटत आहे, या प्रश्नाने आता नव्या चर्चेला तोंड दिले आहे. महुआ मोइत्रा यांनी सांगितले की, सायोनी माझ्या खूप जवळ होती आणि तिच्या या निर्णयामुळे मला मनातून अत्यंत वाईट वाटले आहे.
दुसरीकडे, टीएमसीमधील या मोठ्या फुटीला पक्षांतर्गत हुकूमशाही कारणीभूत असल्याचे बोलले जात आहे. पक्षातून बाहेर पडलेल्या अनेक बंडखोर नेत्यांनी आणि खासदार कल्याण बॅनर्जी यांनी थेट ममता बॅनर्जींचे पुतणे अभिषेक बॅनर्जी यांच्यावर गंभीर आरोप केले आहेत. अभिषेक बॅनर्जी हे अत्यंत घमंडी असून ते पक्षात कोणाचेही ऐकून घेत नाहीत, ते आपले निर्णय इतरांवर जबरदस्तीने लादतात, असा आरोप बंडखोरांनी केला आहे. पक्षातील याच अंतर्गत वादाचा आणि हुकूमशाहीचा फटका टीएमसीला बसला असून सत्ता जाताच खासदारांनी बंड पुकारले आहे. आक्रमक भाषणे ठोकणाऱ्या सायोनी घोष सत्तेचा एक धक्काही सहन करू शकल्या नाहीत आणि त्यांनी पक्षाला रामराम ठोकला, अशी टीकाही आता काही स्तरांतून होत आहे. सायोनी घोष नेमक्या कोणत्या कारणामुळे घाबरल्या होत्या आणि त्यांनी हा टोकाचा निर्णय का घेतला, याचे खरे कारण येत्या काळात समोर येईलच, मात्र सध्या या बंडखोरीमुळे ममता बॅनर्जी यांचे साम्राज्य धोक्यात आले आहे हे मात्र नक्की.