बुलढाणा{विशेष प्रतिनिधी} अमेरिका, इस्रायल आणि इराण यांच्यात सुरू असलेल्या भीषण युद्धामुळे सध्या संपूर्ण जग एका मोठ्या संकटाच्या उंबरठ्यावर उभे आहे. या युद्धाचे पडसाद केवळ सीमेपुरते मर्यादित न राहता, त्याचे चटके आता थेट भारताच्या सामान्य जनतेच्या स्वयंपाकघरापर्यंत पोहोचले आहेत. जागतिक स्तरावर निर्माण झालेल्या या अस्थिरतेमुळे कच्च्या तेलाचे दर गगनाला भिडले असून, भारतामध्ये महागाईने उच्चांक गाठला आहे. अनेक मोठे उद्योगधंदे डबघाईला आले असून, सर्वसामान्यांचे कंबरडे मोडले आहे. यातच सर्वात मोठे संकट उभे राहिले आहे ते म्हणजे घरगुती गॅसचे. एकेकाळी ग्रामीण भागात चुलीवर स्वयंपाक केला जात होता, परंतु बदलत्या काळानुसार आता गॅस हा जीवनावश्यक गरज बनला आहे. मात्र, सध्याच्या परिस्थितीत गॅस मिळवणे म्हणजे जणू एखादे युद्ध जिंकण्यासारखे झाले आहे.
बुलढाणा जिल्ह्यातही या संकटाची भीषणता प्रकर्षाने पाहायला मिळत आहे. जिल्ह्यामध्ये गॅससाठी सर्वसामान्यांना पायपीट करावी लागत असून, विविध कंपन्यांच्या गॅस वितरणात मोठी तफावत दिसून येत आहे. विशेषतः एचपी (HP) गॅसच्या ग्राहकांना गेल्या अनेक दिवसांपासून मोठ्या त्रासाला सामोरे जावे लागत आहे. बुलढाण्यातील एचपी गॅस एजन्सीसमोर ग्राहकांच्या लांबच लांब रांगा लागल्याचे चित्र दररोज पाहायला मिळत आहे. परिस्थिती इतकी गंभीर आहे की, एका हंडीसाठी (सिलेंडर) ग्राहकांना तीन-चार, तर कधी कधी पाच-पाच दिवस ताटकळत उभे राहावे लागत आहे. दुसरीकडे, इंडेन (Indane) गॅसचे वितरण मात्र अत्यंत सुरळीतपणे सुरू असल्याचे चित्र आहे.
या सर्व प्रकाराची दाहकता जाणून घेण्या
साठी आमचे प्रतिनिधी सदाशिव हिवाळे काका यांनी प्रत्यक्ष ग्राऊंड झिरोवर जाऊन पाहणी केली. त्यांनी स्वतः गॅस घेण्यासाठी गेल्यावर त्यांना आलेला अनुभव हा चकित करणारा होता. इंडेन गॅसच्या कार्यालयात गेल्यावर अवघ्या पाच मिनिटांत पावती फाडून त्यांना गॅस सिलेंडर हातात देण्यात आला. तिथे ग्राहकांची कोणतीही गर्दी नव्हती किंवा कोणालाही तासनतास रांगेत उभे राहावे लागले नाही. मात्र, याच्या अगदी उलट परिस्थिती एचपी गॅसच्या केंद्रावर पाहायला मिळाली.
एचपी गॅसच्या ग्राहकांमध्ये सध्या तीव्र संतापाची लाट आहे. हजारो लोक एका सिलेंडरसाठी कामाधंद्यावर पाणी सोडून रांगेत उभे आहेत. प्रतिनिधींनी काही ग्राहकांशी संवाद साधला असता, धक्कादायक माहिती समोर आली. अनेक महिलांनी संताप व्यक्त करत सांगितले की, “दहा-दहा दिवस झाले तरी आम्हाला सिलेंडर मिळालेले नाही. घरी स्वयंपाक कसा करायचा, हा प्रश्न उभा आहे.” एचपी गॅसची गाडी तीन-चार दिवसांनी एकदा येते आणि आल्यावरही काही मोजक्याच लोकांना गॅस मिळतो, बाकीच्यांना रिकाम्या हाताने परत जावे लागते. यामुळे लोकांच्या संयमाचा बांध आता सुटत चालला आहे.
एकाच शहरात दोन वेगवेगळ्या इतकी मोठी तफावत कशी काय असू शकते? इंडेन गॅस आपल्या ग्राहकांना पाच मिनिटांत सेवा देऊ शकते, मग एचपी गॅसला गॅस पुरवठा करताना इतक्या अडचणी का येत आहेत? हा निव्वळ तांत्रिक बिघाड आहे की यामागे काही मोठे अर्थकारण दडलेले आहे, असा सवाल आता नागरिक विचारू लागले आहेत. गॅसचा हा कृत्रिम तुटवडा निर्माण करून काळ्याबाजाराला प्रोत्साहन दिले जात आहे का? असा संशय लोकांच्या मनात निर्माण झाला आहे.
बुलढाण्यातील गॅस एजन्सीच्या या सावळागोंधळामुळे सामान्य जनता भरडली जात आहे. भ्रष्टाचार आणि प्रशासकीय निष्काळजीपणामुळे एचपी गॅसची यंत्रणा कोलमडली आहे का? अशी चर्चा आता चव्हाट्यावर आली आहे. गॅस सिलेंडर हा गरिबांच्या आणि मध्यमवर्गीयांच्या जीवनाचा अविभाज्य भाग आहे. जर तोच वेळेवर मिळाला नाही, तर लोकांनी जगावे कसे? प्रशासनाने या गंभीर बाबीकडे त्वरित लक्ष देऊन एचपी गॅसचा पुरवठा सुरळीत करावा, अशी मागणी जोर धरत आहे.
एकीकडे जागतिक युद्धाचे संकट आणि दुसरीकडे स्थानिक पातळीवर गॅस एजन्सीकडून होणारी अडवणूक, अशा दुहेरी कत्रीत बुलढाण्याचे नागरिक सापडले आहेत. इंडेन गॅसप्रमाणेच एचपी गॅसनेही आपली सेवा जलद आणि पारदर्शक करावी, अन्यथा लोकांच्या संतापाचा मोठा उद्रेक होण्याची शक्यता नाकारता येत नाही. प्रतिनिधी सदाशिव हिवाळे काका यांनी मांडलेला हा अहवाल प्रशासनाचे डोळे उघडणारा ठरेल का, हे पाहणे आता महत्त्वाचे ठरणार आहे. सामान्य माणसाच्या हक्काचा गॅस त्याला सन्मानाने आणि रांगेत न उभे राहता मिळावा, हीच आजच्या काळाची सर्वात मोठी गरज आहे. जर भ्रष्टाचार असेल तर तो मोडून काढण्याची वेळ आता आली आहे.