बुलढाण्यात युवक काँग्रेस आक्रमक! विद्यार्थ्यांवरील लाठीचार्जविरोधात जयस्तंभ चौकात अर्धनग्न आंदोलन; केंद्रावर गंभीर आरोप
बुलढाणा/विश्वमंथन
देशभरात सध्या विविध मुद्यांवरून राजकीय वातावरण चांगलेच तापले असून, विद्यार्थ्यांवर झालेल्या अत्याचाराचे तीव्र पडसाद आता स्थानक स्तरावरही उमटू लागले आहेत. याच पार्श्वभूमीवर पुण्यात आणि इतर ठिकाणी विद्यार्थ्यांवर झालेल्या अमानुष लाठीचार्जच्या निषेधार्थ बुलढाणा शहरातील व्यस्त समजल्या जाणाऱ्या जयस्तंभ चौकात युवक काँग्रेस, किसान आघाडी आणि विद्यार्थी आघाडीच्या वतीने अत्यंत आक्रमक भूमिका घेत एक जोरदार आंदोलन करण्यात आले. विशेष म्हणजे, या आंदोलनादरम्यान कार्यकर्त्यांनी अर्धनग्न होत केंद्र सरकारच्या विरोधात जोरदार घोषणाबाजी केली, ज्यामुळे संपूर्ण परिसरात काही वेळ तणावाचे व खळबळजनक वातावरण निर्माण झाले होते.
काही दिवसांपासून देशाचे भवितव्य असलेले तरुण, विद्यार्थी आणि आंदोलक आपल्या न्याय हक्कांसाठी तसेच विविध मागण्यांसाठी रस्त्यावर उतरून आंदोलन करत आहेत. मात्र, लोकशाही मार्गाने शांततापूर्ण आंदोलन करणाऱ्या या तरुणांवर शासन आणि प्रशासनाकडून अत्यंत क्रूर आणि अमानुषपणे लाठीचार्ज केला जात असल्याचा गंभीर आरोप आंदोलकांनी यावेळी केला. जंतरमंतर आणि इतर भागांत सुरू असलेल्या आंदोलनांमध्ये विद्यार्थ्यांवर झालेल्या या पोलिसी बळाचा निषेध करण्यासाठी बुलढाणा जिल्हा युवक काँग्रेस आणि एनएसयूआयचे (NSUI) कार्यकर्ते रस्त्यावर उतरले होते. ब्रिटिश काळाची आठवण करून देणारे हे प्रकार असून, या देशामध्ये आता लोकशाही जिवंत राहिली आहे का, आणि संविधानाचे राज्य खरोखरच उरले आहे का, असा संतप्त सवाल यावेळी उपस्थित करण्यात आला.
प्रमुख मागण्या आणि आंदोलनाचा रोख
या संपूर्ण आंदोलनामध्ये नीट (NEET) पेपर फुटीच्या प्रकरणाचा मुद्दा प्रकर्षाने पुढे करण्यात आला. पेपर फुटीच्या प्रकरणातील मुख्य सूत्रधार असणाऱ्यांनी तात्काळ आपल्या पदाचा राजीनामा दिला पाहिजे, अशी ठाम मागणी यावेळी करण्यात आली. जोपर्यंत संबधितांचा राजीनामा घेतला जात नाही आणि विद्यार्थ्यांवर अन्याय करणाऱ्यांवर कठोर कारवाई होत नाही, तोपर्यंत आमचा लढा असाच सुरू राहील, असा इशारा आंदोलक नेत्यांनी दिला आहे. आंदोलनादरम्यान केंद्र सरकारविरोधात जोरदार घोषणाबाजी करण्यात आली. “पोलिसांना पुढे करून दडपशाही सुरू आहे,” असासूर आळवत कार्यकर्त्यांनी निषेध नोंदवला.
पोलिसांची कारवाई आणि झटापट
आंदोलन अधिकच तीव्र होत गेल्यानंतर कायदा व सुव्यवस्थेचा प्रश्न निर्माण होऊ नये म्हणून पोलीस प्रशासन तत्काळ सक्रिय झाले. जयस्तंभ चौकात सुरू असलेल्या या आंदोलनाला तीव्र स्वरूप प्राप्त झाल्यामुळे पोलीस आणि काँग्रेस कार्यकर्त्यांमध्ये चांगलीच बाचाबाची आणि झटापट पाहायला मिळाली. आंदोलक कार्यकर्ते मागे हटण्यास तयार नव्हते, तर पोलीस प्रशासनाला आपले कर्तव्य पार पाडत सर्व आंदोलक कार्यकर्त्यांना ताब्यात घ्यावे लागले. या धक्काबुक्की आणि झटापटीमुळे काही काळ वाहतूक व परिसरातील जनजीवन विस्कळीत झाले होते. पोलिसांनी आंदोलकांना ताब्यात घेऊन पोलीस ठाण्यात हलवले, मात्र तरीही कार्यकर्त्यांमधील रोष कमी झालेला दिसून आला नाही.
पुढील संघर्षाचा व आंदोलनाचा इशारा
सोनम वांगचुक यांच्या आंदोलनामध्ये आणि इतर ठिकाणी विद्यार्थ्यांवर झालेल्या अमानुष लाठीचार्जमुळे संपूर्ण देशामध्ये सध्या तीव्र संताप आणि रोषाचे वातावरण पाहायला मिळत आहे. याच देशव्यापी असंतोषामध्ये बुलढाण्याचे युवक काँग्रेस आणि विद्यार्थी आघाडी देखील सामील झाली आहे. जर केंद्र सरकारने या प्रकरणी तातडीने पावले उचलली नाहीत आणि संबंधित मंत्र्यांचा किंवा पदाधिकाऱ्यांचा राजीनामा घेतला नाही, तर याहूनही अधिक तीव्र स्वरूपाचे आंदोलन छेडण्यात येईल, असा इशारा यावेळी देण्यात आला. आगामी काळात काँग्रेस नेते राहुल गांधी यांच्या नेतृत्वाखाली संविधानिक मार्गाने यापेक्षाही मोठे आणि व्यापक आंदोलन संपूर्ण भारतभर उभे केले जाईल, असा इशारा बुलढाण्यातील आंदोलकांनी सरकारला दिला आहे. या आंदोलनामुळे आता आगामी राजकीय वर्तुळात पुन्हा एकदा खळबळ उडाली असून, प्रशासकीय यंत्रणाही सतर्क झाली आहे.
