दिल्लीत खळबळ! पेट्रोल-डिझेलच्या वाढत्या किमती आणि मनमानी धोरणाविरोधात टॅक्सी-टूर ऑपरेटर्सचा संसदेवर धडक मोर्चा; हजारो वाहनचालक रस्त्यावर उतरणार
नवी दिल्ली/विश्वमंथन
देशाची राजधानी दिल्लीतून आज एक अत्यंत महत्त्वाची आणि मोठी बातमी समोर येत आहे. टॅक्सी आणि टूरिस्ट ट्रान्सपोर्ट टूर ऑपरेटर्स असोसिएशनतर्फे पेट्रोलविरोधात दिल्लीत संसदेवर एका भव्य मोर्चाची घोषणा करण्यात आली आहे. या आंदोलनाची हाक मिळताच दिल्लीच्या वाहतूक वर्तुळात आणि प्रशासनात मोठी खळबळ उडाली आहे. दिवसेंदिवस गगनाला भिडत चाललेली महागाई, इंधनाचे वाढलेले भाव आणि त्यामुळे मेटाकुटीस आलेले सर्वसामान्य टॅक्सी चालक व टूर ऑपरेटर्स आता थेट रस्त्यावर उतरून आपल्या हक्कासाठी लढा देण्याच्या तयारीत आहेत.
गेल्या काही महिन्यांपासून देशात इंधनाचे दर सतत वाढत आहेत. पेट्रोल आणि डिझेलच्या किंमती सर्वसामान्य नागरिकांच्या आवाक्याबाहेर गेल्या आहेत. त्यातल्या त्यात व्यावसायिक वाहनांसाठी लागणारे इंधन खरेदी करणे टॅक्सी आणि टूर ऑपरेटर्ससाठी अत्यंत कठीण झाले आहे. एकीकडे वाहनांचा खर्च, देखभाल, विमा, कर्जाचे हप्ते आणि दुसरीकडे प्रवाशांकडून मिळणारे कमी भाडे यामुळे हा वर्ग पूर्णपणे आर्थिक संकटात सापडला आहे. या सर्व ज्वलंत मुद्द्यांना वाचा फोडण्यासाठी आणि शासनाचे लक्ष वेधण्यासाठी टॅक्सी अँड टूरिस्ट ट्रान्सपोर्ट टूर ऑपरेटर्स असोसिएशनने आक्रमक पाऊल उचलत थेट संसदेवर मोर्चा काढण्याचा निर्णय घेतला आहे.
या आंदोलनाची तयारी गेल्या अनेक दिवसांपासून गुप्तपणे सुरू होती. आता मात्र या आंदोलनाला मोठे रूप प्राप्त झाले आहे. दिल्ली आणि आसपासच्या परिसरातील हजारो टॅक्सी चालक, टुरिस्ट व्हॅन चालक आणि ट्रान्सपोर्ट ऑपरेटर्स या मोर्चान्मध्ये सहभागी होणार असल्याची माहिती मिळत आहे. वाहनांच्या वाढलेल्या किमती आणि सुट्या भागांवर आकारला जाणारा भरमसाठ कर यामुळे वाहतूक व्यवसाय करणे आता अशक्य होत चालले आहे, अशी उद्विग्न भावना अनेक चालकांनी व्यक्त केली आहे. पोटाची खळगी भरण्यासाठी आणि कुटुंबाचा उदरनिर्वाह चालवण्यासाठी घेतलेल्या गाड्या आता चालवणे कठीण झाले आहे, कारण मिळणाऱ्या उत्पन्नापेक्षा इंधनाचा खर्चच कैक पटीने जास्त होत आहे.
मोर्चाच्या या घोषणेमुळे दिल्ली पोलिसांची आणि प्रशासनाचीही झोप उडाली आहे. कायदा आणि सुव्यवस्थेचा प्रश्न निर्माण होऊ नये म्हणून संसद भवनाकडे जाणाऱ्या सर्व प्रमुख मार्गांवर कडेकोट सुरक्षा व्यवस्था तैनात करण्याचे संकेत मिळत आहेत. आंदोलक शांततापूर्ण मार्गाने आपला रोष व्यक्त करणार असल्याचे असोसिएशनतर्फे स्पष्ट करण्यात आले आहे, परंतु पोलिसांचा मोठा फौजफाटा आणि बॅरिकेट्स लावून रस्ते बंद करण्याची शक्यता असल्याने सर्वसामान्य नागरिकांना आणि प्रवाशांना वाहतूक कोंडीचा मोठा त्रास सहन करावा लागू शकतो.
टॅक्सी आणि टूर ऑपरेटर्सचे म्हणणे आहे की, सरकार आमचे ऐकून घेत नाही. वारंवार निवेदने देऊनही पेट्रोल आणि डिझेलच्या बाबतीत कोणताही दिलासादायक निर्णय घेण्यात आलेला नाही. डिझेल आणि पेट्रोलच्या दरात कपात करावी, व्यावसायिक वाहनांना सवलतीच्या दरात इंधन उपलब्ध करून द्यावे आणि खासगी ट्रान्सपोर्ट व्यवसायावर लादलेले जाचक नियम तात्काळ मागे घेण्यात यावेत, या त्यांच्या प्रमुख मागण्या आहेत. जर सरकारने अद्यापही या गंभीर प्रश्नाकडे दुर्लक्ष केले, तर हा लढा आणखी तीव्र केला जाईल आणि संपूर्ण देशात वाहतूक सेवा बंद करण्याचा इशाराही काही नेत्यांनी दिला आहे.
या संपूर्ण घडामोडींवर आता संपूर्ण देशाचे लक्ष लागून राहिले आहे. संसदेवर निघणारा हा मोर्चा कितपत यशस्वी ठरतो आणि शासन यावर काय भूमिका घेते, हे येणारा काळच ठरवेल. मात्र, सध्याची परिस्थिती पाहता सर्वसामान्य टॅक्सी चालकांच्या मनात शासनाविषयी प्रचंड रोष निर्माण झाल्याचे स्पष्टपणे दिसून येत आहे. एकीकडे महागाईचा वणवा आणि दुसरीकडे पोटाची आग विझवण्यासाठी चाललेली ही धडपड, या संघर्षात आता कोण बाजी मारणार आणि चालकांना न्याय मिळणार का, हे पाहणे महत्त्वाचे ठरणार आहे.
