महाराष्ट्र बंदची थेट हाक: प्रकाश आंबेडकरांचा सरकारवर जोरदार हल्ला, २३ जुलैला राज्यभर कडक बंद पाळण्याचे आवाहन
मुंबई/विश्वमंथन
शिक्षणाच्या माध्यमातून नवीन पिढीला विचार आणि दृष्टिकोन मिळतो, मात्र आगामी पिढीला ही विचार करण्याची क्षमता आणि योग्य दृष्टी मिळूच नये, अशाच प्रकारचा राजकीय दृष्टिकोन आणि धोरण सध्याच्या सरकारचे दिसून येत आहे, असा गंभीर आरोप वंचित बहुजन आघाडीचे प्रमुख प्रकाश आंबेडकर यांनी केला आहे. सरकारच्या या धोरणाविरोधात आणि विद्यार्थ्यांवर होणाऱ्या अमानुष अत्याचाराच्या निषेधार्थ संपूर्ण देशात मोठे आंदोलन उभारण्याची गरज व्यक्त करत त्यांनी २३ जुलै रोजी महाराष्ट्र बंदची थेट हाक दिली आहे. दिल्लीमध्ये आंदोलक विद्यार्थ्यांवर ज्या पद्धतीने अमानुष लाठीचार्ज करण्यात आला आणि पाण्याच्या फवाऱ्यांचा मारा करण्यात आला, त्यावर प्रकाश आंबेडकर यांनी तीव्र संताप व्यक्त केला. आंतरराष्ट्रीय स्तरावर युनायटेड नेशन्सने छर्र्यांच्या वापरावर पूर्णपणे बंदी घातलेली असतानाही दिल्ली पोलीस अशा छर्र्यांचा वापर विद्यार्थ्यांवर करत आहेत, हे अत्यंत भयानक आहे. विद्यार्थ्यांच्या अंगात हे छर्रे घुसले असून, पोलिसांचे हे वर्तन पाहता जनरल डायर पुन्हा जन्माला आला आहे का आणि ही त्याचीच कृती आहे का, असा संतप्त सवाल त्यांनी उपस्थित केला. अशा प्रकारच्या दडपशाहीविरोधात आणि भविष्यात विद्यार्थ्यांवर पुन्हा असा लाठीचार्ज होऊ नये यासाठी आम्ही विविध संघटनांशी चर्चा करून रस्त्यावर उतरण्याचा निर्णय घेतला आहे.
सध्याच्या काळात परीक्षेमधील घोटाळे प्रचंड प्रमाणात वाढले आहेत. शिक्षणाच्या आणि परीक्षांच्या माध्यमातून विद्यार्थ्यांची विचार करण्याची आणि योग्य निर्णयापर्यंत पोहोचण्याची जी नैसर्गिक कृती असते, तीच मुळात संपवण्याचे कारस्थान रचले जात आहे. लोकांना जाणीवपूर्वक अशिक्षित ठेवायचे आणि जनता अशिक्षित राहिली की आपली सत्ता कायम राहील, असा एक भ्रामक आभास सरकारमधील लोकांकडून निर्माण केला जात आहे. या संपूर्ण शिक्षणविरोधी आणि लोकशाहीविरोधी कारभाराला चोख प्रत्युत्तर देण्यासाठीच २३ जुलैचा महाराष्ट्र बंद जाहीर करण्यात आला आहे. राज्यात सध्या हुकूमशाहीची पाळेमुळे घट्ट होत असून, मुख्य राजकीय पक्षांना मोडकळीस आणण्याचे काम सुरू आहे. अशा अत्यंत नाजूक व गंभीर टप्प्यावर सामान्य माणसाने शांत बसून चालणार नाही, तर सर्वसामान्य नागरिकांनी स्वतः रस्त्यावर उतरून आपली स्पष्ट भूमिका मांडली पाहिजे. या आंदोलनाच्या आणि बंदच्या माध्यमातून जनतेचा रोष सरकारपर्यंत निश्चितपणे पोहोचेल, असा विश्वास त्यांनी व्यक्त केला.
या बंदचे स्वरूप अत्यंत कडक परंतु पूर्णपणे शांततापूर्ण मार्गाने असेल. हा बंद यशस्वी करण्यासाठी जिल्ह्या-जिल्ह्यांतील व्यापारी संघटना, विविध उद्योग समूह आणि वाहतूक संघटनांशी संवाद साधून त्यांना पाठिंब्याचे आवाहन केले जात आहे. जे राजकीय पक्ष भारतीय जनता पक्षासोबत जाण्यास तयार नाहीत किंवा भाजपशी कोणताही संबंध ठेवू इच्छित नाहीत, अशा सर्व भाजपविरोधी पक्षांनी या आंदोलनाला उघडपणे पाठिंबा द्यावा, अशी अपेक्षा त्यांनी व्यक्त केली. वस्तुतः भाजप आणि राष्ट्रीय स्वयंसेवक संघाच्या या धोरणांविरोधात राष्ट्रीय स्तरावरील मान्यताप्राप्त राजकीय पक्षांनी स्वतःहून पुढे येऊन लढा उभारणे गरजेचे होते. मात्र, मोठे राजकीय पक्ष गप्प बसल्यामुळेच शेवटी आंदोलनात्मक भूमिका घेणाऱ्या राजकीय पक्षांना आणि संघटनांना हे आक्रमक पाऊल उचलावे लागत आहे. महाविकास आघाडी आणि भाजपविरोधी दावे करणाऱ्या पक्षांनी खरोखरच सत्ताधाऱ्यांचे धोरण मोडून काढायचे असेल, तर त्यांनी या बंदला पूर्ण ताकदीने पाठिंबा दिला पाहिजे.
आंदोलकांवर होणाऱ्या पोलीस कारवायांवर बोलताना प्रकाश आंबेडकर यांनी अत्यंत परखड आणि कायदेशीर भूमिका मांडली. लोकशाहीत शांततेच्या मार्गाने आंदोलन करणे हा नागरिकांचा मूलभूत अधिकार आहे आणि या अधिकारासाठी पोलिसांची कोणतीही पूर्वपरवानगी मागण्याची अजिबात गरज नसते. आम्ही पोलिसांकडे कधीही परवानगी मागायला जात नाही, तर केवळ आंदोलनाची माहिती देण्यासाठी आमचे पत्र पोलीस ठाण्यात देऊन येतो. सध्या आंदोलकांवर किंवा नागरिकांवर पोलीस कायद्यातील कलम ३७(१) आणि ३७(३) अंतर्गत नोटिसा बजावण्याचे जे प्रकार सुरू आहेत, ते पूर्णपणे चुकीचे आणि बेकायदेशीर आहेत. मंत्रालयाचा परिसर सोडला तर इतर कुठेही अशी परिस्थिती नाही, त्यामुळे पोलिसांच्या या नोटिसा कोणत्याही न्यायालयात टिकणाऱ्या नाहीत.
२३ जुलैच्या या बंदच्या दिवशी संपूर्ण महाराष्ट्रात कडक आणि शांततामय बंद पाळण्याचे आवाहन करण्यात आले आहे. व्यापाऱ्यांनी स्वतःहून आपली दुकाने व प्रतिष्ठाने बंद ठेवावीत, कामानिमित्त बाहेर पडणाऱ्या नागरिकांनी सेवांमध्ये न जाता सहभाग नोंदवावा, तसेच टॅक्सी, ओला आणि उबर चालकांनी आपल्या गाड्या रस्त्यावर आणू नयेत. यासोबतच बेस्ट आणि एसटी महामंडळाच्या बस चालकांनी व वाहकांनी त्या दिवशी गाड्या डेपोच्या बाहेर काढू नयेत, असे आवाहन करण्यात आले आहे. सर्वसामान्यांच्या हक्कासाठी आणि शिक्षणाच्या रक्षणासाठी हा बंद पुकारण्यात आला असून जनतेने यामध्ये मोठ्या संख्येने सहभागी व्हावे, असे आवाहन त्यांनी केले.
